Սեպտեմբերի 5-ին, ժամը 11:00-15:00-ը, Ծաղկաձորի Կենտրոնական հրապարակում տեղի ունեցավ Հայկական Կարմիր խաչի ընկերության (ՀԿԽԸ) կամավորական թիմերի հանրապետական մրցույթը:
Մրցույթին մասնակցում էր 10 թիմ. 2-ը` Երևանից, 2-ը` Իջևանից, թիմեր Այգեձորից, Բերդից, Վանաձորից, Եղեգնաձորից և Աշտարակից, ևս մեկ թիմ Երևանից, որը ներկայացնելու է Հայկական Կարմիր խաչի ընկերությունը սեպտեմբերին Ռումինիայում կայանալիք Առաջին օգնության 2015թ. Եվրոպական մրցույթին, մասնակցեց արտամրցութային կարգով:
Մասնակիցների` Առաջին օգնության հմտությունները ստոուգելու համար նախապատրաստվել էր 7 կայան, որոնցից մեկը` Շվեյցարիայի սամարացիների ֆեդերացիայի կողմից: Ֆեդերացիայի հետ համագործակցությունն սկսվել է 2000 թվականից, և կազմակերպությունը մշտապես աջակցել է ԱՕ մրցումների և դասընթացների իրականացմանը:
Կայաններում բեմականացվեցին դժբախտ պատահարներ` օտար մարմին, ուժեղ արյունահոսություն, շոկ, գլխի վնասվածք, գիտակցության կորուստ, որովայնի փակ վնասվածք, կոտրվածք և այլն:
Պայքարի արդյունքում 3-րդ տեղը զբաղեցրեց Երևան 2 թիմը, 2-րդ տեղը կիսեցին Իջևանն ու Վանաձորը, իսկ 1-ին տեղում Աշտարակի թիմն էր: Իրենց մրցանակային տեղերը սահմանեցին նաև Շվեյցարիայի սամարացիների ֆեդերացիայի ներկայացուցիչները, ըստ որի՝ կրկին 3-րդ տեղում էր Երևան 2 թիմը, 2-րդը՝ Բերդը, իսկ առաջին պատվավոր տեղում իր լավագույնը լինելը հաստատեց Աշտարակի թիմը:
Մրցույթի և դրան նախորդած նախապատրաստական դասընթացների շնորհիվ ավելի քան 100 երիտասարդներ ծանոթացան ու տիրապետեցին Առաջին օգնության գիտելիքներին ու հմտություններին, և անհրաժեշտ պահին կարող են օգնության հասնել ու կյանքեր փրկել: Այս գիտելիքները հատկապես կարևոր են Հայաստանի սահմանամերձ համայնքների համար:
Միջոցառումն անցկացվեց ՀԿԽԸ, ԿԽՄԿ և Գերմանական Կարմիր խաչի Բադեն-Վյուրտեմբերգի մասնաճյուղի հետ համագործակցության ծրագրերի շրջանակներում:
ՀԿԽԸ Առաջին օգնության ուսումնամեթոդական կենտրոնն իրականացնում է Եվրոպական խորհրդատվական կենտրոնի չափանիշներին համապատասխանող ԱՕ և Անվտանգ վարքագծի դաստիարակման դասընթացներ և սեմինարներ՝ տարբեր տարիքային և մասնագիտական խմբերի համար, ԱՕ սպասարկում զանգվածային միջոցառումների ժամանակ, ինչպես նաև ծրագրեր` ուղղված աճող սերնդի անվտանգ վարքագծի դաստիարակմանը:
