Ոչ վարակիչ հիվանդությունները, այդ թվում շաքարային դիաբետը, մահացության հիմնական պատճառներից են ամբողջ աշխարհում, այդ թվում Հայաստանում: Հայաստանի Հանրապետությունում մահերի 85,5 %-ը պայմանավորված է ոչ վարակիչ հիվանդություններով, որոնց շարքում շաքարային դիաբետը, որպես մահվան պատճառ, հինգերրորդ տեղում է:
Հաշվի առնելով վերը նշվածը Հայկական Կարմիր Խաչի ընկերությունը Դանիական Կարմիր Խաչի հետ համագործակցությամբ և Դիաբետի համաշխարհային հիմնադրամի ֆինանսավորմամբ իրականացրեց «Շաքարային դիաբետի կանխարգելման և խնամքի վերաբերյալ կրթում» ծրագիրը:
Ծրագիրն իրականացվեց ՀՀ Արարատի մարզում, ընդգրկելով ինչպես քաղաքային այնպես էլ գյուղական համայնքները:
Ծրագրի շահառուները շաքարային դիաբետով հիվանդներն էին, նրանց ընտանիքի անդամները, թիրախ բնակավայրերի բնակչությունը՝ ներառյալ երիտասարդությունը և շաքարային դիաբետի առումով ռիսկի խմբերը:
Ծրագրի նպատակն էր բարելավել շաքարային դիաբետի կանխարգելումը և խնամքը ՀՀ Արարատի մարզում:
Հիմնական ուղղություններն էին շաքարային դիաբետ ունեցող անձանց համար աջակցող միջավայր ստեղծելու միջոցով շաքարային դիաբետի բարդությունների կանխարգելումը և առողջ ապրելակերպի վերաբերյալ բնակչության իրազեկվածության բարձրացումը:
