Նորություններ
Տավուշի սահմանամերձ տասը համայնքների...

Տավուշի սահմանամերձ տասը համայնքների քաղպաշտպանության ջոկատները ձեռք բերեցին Առաջին օգնության հմտություններ

12.10.2017
Տավուշի սահմանամերձ տասը համայնքների քաղպաշտպանության ջոկատները ձեռք բերեցին Առաջին օգնության հմտություններ

Հայկական Կարմիր խաչի ընկերությունը օգոստոս – սեպտեմբեր ամիսներին Տավուշի մարզի տասը համայնքներում՝ Ազատամուտ, Չինարի, Մովսես, Ներքին Կարմիրաղբյուր, Պառավաքար, Կոթի, Սարիգյուղ, Ոսկևան, Բերդավան և Այգեպար, Առաջին օգնության դասընթացներ անցկացրեց Արտակարգ իրավիճակների նախարարության հենակետերում՝ քաղպաշտպանության փրկարարական ջոկատների անդամների համար: Ընդհանուր առմամբ դասընթացներին մասնակցեց 205 մարդ:

 

 Առաջին օգնության դասընթացների անցկացման նպատակը համապատասխան հմտությունների և գիտելիքների փոխանցումն է, ինչը թույլ կտա տեղում գործող ուժեղացված փրկարարական ուժերին ավելի արագ և արդյունավետ արձագանքել արտակարգ իրավիճակներին: Սահմանամերձ գյուղերում մարդկանց պատրաստվածությունն այս ոլորտում բարձրացնելն ավելի է անհրաժեշտ, քանի որ շատ են դժվարհասանելի վայրերն ու, դրանով պայմանավորված, շտապօգնությունների ուշացումները, - նշում է ՀԿԽԸ Առաջին օգնության բաժնի վարիչ Զառա Խուդոյանը: Հայկական Կարմիր խաչի ընկերությունը` Կարմիր խաչի միջազգային կոմիտեի աջակցությամբ, Առաջին օգնության դասընթացներ սահմանամերձ համայնքներում բնակչության տարբեր խմբերի համար կազմակերպում է արդեն մի քանի տարի: Դասընթացները վարում են ՀԿԽԸ հրահանգիչները՝ Առաջին օգնության եվրոպական խորհրդատվական կենտրոնի չափանիշներին համապատասխան:

 

Հունիսի 28-ին ՀՀ արտակարգ իրավիճակների նախարարության, Հայկական Կարմիր խաչի ընկերության և Հայաստանում Կարմիր խաչի միջազգային կոմիտեի պատվիրակության միջև ստորագրվեց «Հայաստանի Տավուշի մարզում քաղաքացիական պաշտպանության փրկարարական ծառայության կարողությունների զարգացման ոլորտում 2017-2018թթ. Համագործակցության ծրագիր» եռակողմ համաձայնագիրը: Ծրագիրը ստորագրեցին ՀՀ ԱԻ նախարար Դավիթ Տոնոյանը, Հայկական Կարմիր խաչի ընկերության նախագահ Մխիթար Մնացականյանը և ՀՀ-ում Կարմիր խաչի միջազգային կոմիտեի պատվիրակության ղեկավար Կարոլին Դույեզը:

Ծրագրի նպատակն է սահմանամերձ համայնքների բնակչության պաշտպանությունն ու բնակչության պատրաստվածության մակարդակի բարձրացումը:

Նախատեսվում է նաև վերապատրաստման դասընթացներ անցկացնել համայնքների մանկապարտեզների և դպրոցների մանկավարժական կազմի հետ, որպեսզի վերջիններս էլ իրենց հերթին սովորեցնեն երեխաներին անվտանգության վարքականոնները տարատեսակ աղետների և արտակարգ իրավիճակների ժամանակ: Բնակչության պաշտպանության և պատրաստվածության դասընթացների կարևորագույն բաղադրիչներից է նաև միջազգային մարդասիրական իրավունքի ուսուցանումը: