Օֆելյա Գ.-ն 14 տարեկան է, սովորում է 9-րդ դասարանում: Արդեն 2 տարի է ինչ հաճախում է Հայկական Կարմիր խաչի ընկերության կողմից կազմակերպվող «Ժպիտների ակումբ», որը գործում է Երևանի հանրակացարաններից մեկում, որտեղ ինքն ապրում է:
- Երբ կամավորները գալիս են, մի տեսակ ոնց որ մեր օրը լցվի, ավելի ուրախ ու հետաքրքիր է անցնում, հետո շատ բաներ ենք սովորում կամավորներից, խաղեր ենք խաղում, մի խոսքով շատ հավես է անցնում, - ասում է նա:
Հայկական Կարմիր խաչի ընկերությունը 2022 թվականի հոկտեմբերին Ավստրիական Կարմիր և Լիխտենշտենյի Կարմիր խաչերի աջակցությամբ վերսկսեց «Ժպիտների ակումբ» ծրագիրը, որի շրջանակներում Երևանի և Աբովյանի 2 հանրակացարաններում բնակվող 7-14 տարեկան երեխաների համար իրականացվում են ոչ ֆորմալ կրթական միջոցառումներ՝ նպաստելու նրանց ինտրեգրմանը և ընդհանուր զարգացմանը: ՀԿԽԸ կամավորներն ամեն օր այցելում են երեխաներին, օգնում տնային առաջադրանքների հարցում, ինչպես նաև կազմակերպում առանձին խմբակները, ինչպիսիք են անգլերենի, կերպարվեստի և այլն, հնարավորություն տալով երեխաներին ավելի խորը գիտելիքներ ձեռք բերել կոնկրետ առարկաների վերաբերյալ։
Կամավորները կազմակերպում են նաև այցելություններ թատրոններ, թանգարաններ և մշակութային այլ վայրեր։ Միասին տոնում են Ամանորը, Զատիկը, Երեխաների պաշտպանության միջազգային օրը և այլ տոներ։
- Օֆելյան մեծ սիրով է սպասում խմբակներին և դպրոցում էլ առաջադիմել է, - ասում է Օֆելյայի մայրիկը՝ Մարինեն, - շատ շնորհակալ ենք կամավորներին իրենց աշխատանքի համար:
Անի Գևորգյանը Հայկական Կարմիր խաչի ընկերության կամավոր է ավելի քան 5 տարի, և արդեն համարվում է առաջնորդ (լիդեր) կամավոր:
- Առաջին հերթին զարգացել են իմ կազմակերպչական և թիմային աշխատանքի հմտությունները, ապա ձեռք եմ բերել շատ ընկերներ, - պատմում է Անին, - Հայկական Կարմիր խաչում կամավոր լինելու շնորհիվ կարողացել եմ փոխանակման ծրագրով լինել արտասահմանում, ինչը գիտելիքներ և փորձ ստանալու մեծ հնարավորություն տվեց: «Ժպիտների ակումբում» շատ հաճելի է տեսնել երեխաների առաջադիմությունը դպրոցում, երբ երեխան, որի հետ աշխատում ես, սկսում է 9-10 ստանալ, ավելի կարգապահ ու պարտաճանաչ դառնալ:
