Մեկնարկել է «Լեռնային Ղարաբաղի հակամարտությունից տուժած բնակչության կենսապահովման և բարեկեցության խթանում Հայաստանում» ծրագիրը
Հայկական Կարմիր խաչի ընկերությունը 2023 թվականի դեկտեմբերի 1-ից՝ Եվրամիության Մարդասիրական օգնության և Ավստրիական Կարմիր խաչի ֆինանսավորմամբ, իրականացնում է «Լեռնային Ղարաբաղի հակամարտությունից տուժած բնակչության կենսամակարդակի և բարեկեցության ապահովում Հայաստանում» ծրագիրը՝ ներգրավելով Արմավիրի, Արարատի և Կոտայքի մարզերում բնակվող տեղահանված անձանց։
Ծրագրի շրջանակներում՝ մինչև 2024 թվականի դեկտեմբեր ամիսը, անհատական և խմբային հոգեբանական աջակցություն կտրամադրվի մոտ 10 հազար անձի, 500 ուսուցիչ կվերապատրաստվի երեխաների պաշտպանության և հոգեբանական առաջին օգնության թեմաներով, կստեղծվի 6 ապահով տարածք (Ժպիտների ակումբ) երեխաների համար, կանխիկ դրամական աջակցություն կստանա 3232, կենսապահովման աջակցություն՝ 1000 անձ (խորհրդատվություն, աշխատանքի տեղավորման աջակցություն, ուղղորդում)։
Ծրագրի հիմնական նպատակն է բարելավել տեղահանված անձանց հոգեբանական վիճակը և նպաստել նրանց տնտեսական ինտեգրմանը։
Հայկական Կարմիր խաչի ընկերությունը (ՀԿԽԸ), հանդիսանալով Կարմիր խաչի և Կարմիր մահիկի միջազգային շարժման լիիրավ անդամ, առաջնորդվում է Շարժման հիմնարար սկզբունքներով` Մարդասիրություն, Անկողմնակալություն, Չեզոքություն, Անկախություն, Կամավորություն, Եզակիություն, Համընդհանրություն։
Հանդիսանալով կառավարությանն աջակցող կառույց՝ մարդասիրական ոլորտում, ՀԿԽԸ-ն արդեն 104 տարի է գործունեություն է ծավալում հանրապետության ամբողջ տարածքում հետևյալ ռազմավարական ուղղություններով՝ աղետների կառավարում, բնակչության տեղաշարժ, սոցիալ – առողջապահություն, առաջին օգնություն, երիտասարդական, մարդասիրական արժեքների տարածում և այլն:
ՀԿԽԸ առաքելությունն է նվազեցնել բնակչության խոցելիությունը` մարդասիրության ուժի մոբիլիզացմամբ, նախապատրաստվել դիմակայելու այն իրավիճակներին, որոնք կարող են բնակչության խոցելիության պատճառ դառնալ, ցուցաբերել անհրաժեշտ օգնություն` սատարելով սոցիալ-տնտեսական ծանր պայմաններում գտնվող մարդկանց:
