Նորություններ
Մեդիայի դերը փախստականների պաշտպանության...

Մեդիայի դերը փախստականների պաշտպանության գործում

08.10.2018
Մեդիայի դերը փախստականների պաշտպանության գործում

Հարկադիր տեղահանման գլոբալ միտումները, միգրացիայի եւ ապաստանի վերաբերյալ համապատասխան սահմանումները, չվերադարձելիության սկզբունքը որպես փախստականների պաշտպանության հիմնական գրավական՝ այս և միգրացիային վերաբերող բազմաթիվ այլ հարցեր էին ներառված հոկտեմբերի 5-ին Մեդիա նախաձեռնությունների կենտրոնում լրագրողների համար կազմակերպված «Մեդիայի դերը փախստականների պաշտպանության գործում» խորագրով դասընթացին։ Այն կազմակերպել էր Հայկական Կարմիր խաչի ընկերությունը՝ ՄԱԿ-ի Փախստականների գերագույն հանձնակատարի գրասենյակի (ՄԱԿ ՓԳՀ), Միգրացիայի պետական ծառայության և Մեդիա նախաձեռնությունների կենտրոնի հետ համագործակցությամբ։

Նպատակն էր ոլորտում աշխատող լրագրողներին և թեմային սերտորեն առնչվող պետական գերտեսչությունների լրատվական ծառայությունների ներկայացուցիչներին ներկայացնել ապաստան հայցողների և փախստականներին վերաբերող ՀՀ օրենքներն ու ընթացակարգերը, ինչպես նաև փախստականների խնդիրների լուսաբանման առանձնահատկությունները և էթիկական խնդիրները, Հայկական Կարմիր խաչի ընկերության և ՄԱԿ ՓԳՀ մանդատն ու գործունեությունը նշված ոլորտում։

- Բնակչության տեղաշարժի ուղղությունը մեր ռազմավարական ուղղություներից է, և այս ոլորտում մենք երկար տարիների արդյունավետ համագործակցություն ունենք ՄԱԿ ՓԳՀ-ի հետ։ Մեծապես կարևորում ենք լրատվամիջոցների դերը՝ մեր գործունեությունը լուսաբանելու և, այդպիսով, փախստականների խնդիրները բարձրաձայնելու գործում։ Շնորհակալ ենք, որ այսօր ժամանակ եք գտել այստեղ գտնվելու համար, - ողջույնի խոսքում նշեց ՀԿԽԸ գլխավոր քարտուղար Աննա Եղիազարյանը։